किम जोंग उन यांच्याबाबतीत चर्चांना पुर्णविराम ! २० दिवसानंतर आले सार्वजनिक कार्यक्रमात

प्योंगयांग: उत्तर कोरियाचे प्रमुख किम जोंग उन यांच्या प्रकृती अस्वास्थाबद्दल गेल्या काही दिवसांपासून उलटसुलट चर्चा सुरू होती. मात्र शुक्रवारी ते जगासमोर आले. गेल्या २० दिवसांपासून ते कोणत्याही कार्यक्रमात दिसले नव्हते. त्यामुळे त्यांच्या प्रकृतीबद्दल वृत्त येत होतं. मात्र अखेर २० दिवसांनंतर ते एका सार्वजनिक कार्यक्रमाला उपस्थित राहिल्याची बातमी उत्तर कोरियाच्या सरकारी वृत्तसंस्थेनं दिली. कोरियन सेंट्रल न्यूज एजन्सीनं (केसीएनए) दिलेल्या माहितीनुसार, किम जोंग उन एका खतं निर्मिती करणाऱ्या कारखान्याच्या उद्घाटनाला उपस्थित होते. हे ठिकाण राजधानी प्योंगयांगपासून जवळ आहे. यावेळी किम यांची बहिणदेखील उपस्थित होती. किम यांच्यानंतर त्यांच्या बहिणीकडे देशाची सूत्रं जाऊ शकतात, अशीदेखील चर्चा गेल्या काही दिवसांत जागतिक माध्यमांमध्ये सुरू होती.