करोनावर लस बनवण्यात चीनची आडकाठी !

बीजिंग : करोनाच्या संसर्गावर नियंत्रण यावे अशी चीनची इच्छा नसल्याचे एका अहवालात नमूद करण्यात आले आहे. अमेरिका, ब्रिटन, कॅनडा, ऑस्ट्रेलिया आणि न्यूझीलंड या पाच देशांच्या गुप्तचर संस्थांनी हा अहवाल तयार केला आहे. चीनने ग्राउंड झिरोवर जाण्यास अथवा पेशंट झिरोला भेटण्यासही मनाई केली असल्याचे अहवालात म्हटले आहे. याच अहवालाच्या आधारावर अमेरिकेचे राष्ट्राध्यक्ष डोनाल्ड ट्रम्प चीनवर आरोप करत असल्याची चर्चा आहे. यानुसार, करोनाचा संसर्ग माणसांमध्ये फैलावत असल्याची माहिती चीनने जाणीवपूर्वक लपवली. त्याशिवाय ज्या डॉक्टरांनी, पत्रकारांनी करोनाबाबतची माहिती देण्याचे प्रयत्न केले, असे लोक अचानकपणे गायब झाली असल्याचेही म्हटले आहे. करोनाचा संसर्ग फैलावल्यानंतर चीनने संबंधित संशोधन संस्थेतील एक प्रयोगशाळाच नष्ट केली. त्याशिवाय यामध्ये काम करणारे शास्त्रज्ञ आणि कर्मचारी गायब झाले असल्याचा दावा करण्यात आला आहे.